الشاعرة/ إيمان البكري

كلنا بنحبك يا حمار




بيقولوا في مطرب مكار...بيغني بحبك يا حمار

الواد ده وصولي وكداب..ومنافق وكمان نعار

وإشمعنى لوحده اللي يحبك...كلنا بنحبك يا حمار

ده لأنك فعلا متفاهم... ومبرطع فينا ومش فاهم

وبتبعد عن أي تفاهم .. بعزيمة غبية وإصرار

العِشرة ما بينا ما بتهونشي..وإن هانت..برضو ما نقدرشي

محكمة العدل ما تحكمشي..وإن حكمت.. هتولع نار

مثلتوا علينا الثلاثية.. وبطولة وكانت جماعية

وعشان ما تكمل سداسية..عملتوا ألف حصار وحصار

وفي وسط ميدان الحرية..فيه شعلة مسكاها وليّة

متكنش دي ليزا المخفية..مدية إشارة إنذار

وعلى العموم أنا حبيتك
وإلهي يا بعيد يخرب بيتك

لو يوم هتشُك في إخلاصي..وتصدق ده من الأشرار

هو سؤال ومافيهش هزار....هو أنت يعني حمار يا حمار

علشان تصدق إن الفار.. ممكن يقول لأسد يا حمار

وبعاهدك والعهد أمانه..هتّنَّك على طول ويانا

حمورية أهلك عجبانا..يا واخدنا من الدار للنار

كل الحميره هنا عملت سين...واتفقت انك بغل عظيم

هيوزعوا شربات برسيم ...علي العربخاني وعلي الزوار

أنا مش حمّار هتخاف مني

مانا برضو حمار وأحمر منك

ما تنهق..قول أي حوار

بنقولك شيي..ما بتمشيشي....والحااا..بنقولها ما بتجيشي

ونقولك هيييسس...ما بتهيسش..ومكمل بينا المشوار

وعلشان كده إحنا إخترناك..وعلى حياتنا إستئمناك

ولا يوم هيجي يفرقنا...وهنفضل دايما وياك

تقول ايمان بكري في أولى قصائدها:

زمن تكلب والكلاب تكلبوا

جيش تجيش والذئاب تكالبوا

من كهفهم حكموا البلاد فأسهبوا

وتصدعت أوجاعنا لم يرأبوا

نصف الرجال تزوجوا وتحجبوا

والنصف ينتظر السماح لينجبوا

فتقدمي يا عبل·· مرمى زينب

بشراكم·· بشراكم

هذا دمي فلتعبروا

وتجرعوا

وتعاقروا حتى الثمالة·· أبشروا

ما عاد في قلبي انبعاث

فانثروا ذراته عبر الجحيم

تنفسوا أوجاعه

ثم انفذوا

بين اشتعال الجرح

بين حرائقي

جسر جليدي

ونهر من حريق

فتراقصوا في مرقص الطغيان

واحتلوا المنافذ

والنوافذ

والطريق

إنا على سجادة الدعوات

ننتظر المسافر

والبريد

ونخبئ الصلوات خلف ضلوعنا

ويؤمنا أنصاف آلهة

على أقدامهم تنسل قافلة العبيد

فلتسكتوا جوعى النسور بنطفة من لحمنا

وبجرعة من حلمنا

لا·· لن تثور الثائرة

نحن لها عند المخاض عباقرة

عند الفرار جبابرة

فلتدخلوا كل البلاد الى محيط الدائرة

وتجرعوا دمنا النبيذي المراق

من الفرات··

الى حدود القاهرة

سـلام مربـع

للي ربّع
او مدوّر
للي دوّر
في البلد دي ع الأمانـي
سـلام مربـع للأمانـي
وجمهورية كانـي مانـي
ولنظامها البرلمانـي
سـلام مربـع للكبير اللي استربّع
فوق دماغ مشّش و صدّع
من كـلام عمال بيرسم
دنـيا حلوة فـ الأغانـي
سـلام مربـع للأغانـي




سـلام و داير ع الصوانـي
كـلام و ماشي في ديل كـلام
ولحن تايه في الزحام
غنّى النظام علشان ننام على صوته
نمنا ما قومنا تانـي
سـلام مربـع للي ناموا ماقاموا تانـي
اللي طافوا واللي خافوا
واللي شد عليه لحافُه
وغمّى عينه ع اللي شافه
و راح يقدم للي كمم صوتنا
ولابنه التهانـي
سـلام مربـع للتهانـي



ابن وز وغصب عنا في نيل هوانا
سوا برضانا او المهانه
راح يعوم
ابن حاكم يبقي حاكم
بالوفاق او بالمحاكم
في القانون المستحيل لازم يهون
والوريث يصبح رئيس
بشكل شرعي و فـ ثوانـي
سـلام مربـع للثوانـي




تشريعات على كيف هواهم شرّعوها
وعود قالوها و ضيّعوها
و لعبة بايخة اتعودوها
ناس بترضى وناس بتخضع
ناس مُناها تحب تسمع
يبقى تسمع على مزاج
خطبة تخلق الف مصنع
خطبة تروي و خطبة تشبـع
خطبة تبنـي
فوق رمال الصحرا ألَفات المبانـي
سـلام مربـع للي بانـي


بانـي مجد عشان طموح
مجـروح جمـوح
ظالـم أنانـي
اللي علّى لاجل يعلا
واللي غنّى لاجل يغنا
واللي لما وريده يعطش
يملا بدمانا القنانـي
واللي عمّر واللي دمّر
واللي فكّك واللي سمّر
واللي حزّر واللي فزر
واللي عارض واللي هزّر
واللي شاف الباشا مصلح
واللي شافه وضيع وجانـي
سـلام مربـع للي جانـي


شيء يحزّن
لما صاحب الحق يشحت
لما لون الصدق يبهـت
لما يصبح في البلد دي
الشمال زي اليمين
شيء يحزّن.. شيء يحزّن
لما نرضى و نستكين
و لما يرقص طول السنـين
أراجوز لعيـن
بشكل سافر بهلوانـي
قال هوانـي.. وزاد هوانـي



سـلام مربـّع
للي قال انه هوانـي
وزاد هوانـي
للوعود البهلوانـي
للوريث المعجبانـي
للنظام البرلماني الكاني ماني



سـلام مربـع
للي قطّع واللي ربّع
و اللي مزّع و اللي وزّع
و اللي قلّع و اللي ولّع
و اللي دلّع..
و اللي شخلع في البلد دي
لاجل تبقي
صورة أفظع
للنظام الامريكانـي
سـلام مربـع
للنظام المصر كانـي

البغبغان


بيقول اخر بيان للبغبغان اللي في بلاد العم سام كان بهبهون مافهمنهوس بعبع
وقال بؤين كلام والمعنى ايه ماعرفنهوش

معقول يكون البغبغان اللي تبغبغ من زمان صواميل دماغه اتلخلخو عمال يلخبط في الكلام والعقل عامل شقلبان آم جبله اورطة يمخمخو

عملوا وطن من غير ببان احكموا فيه الغلان ووطن جعان

وازاي ينام والطمعجية كتير وناموا وانتخوا

والبغبغان يكره يموت يسمع سكوت المخروصين

ان قولت بم قفاك يرن عليه ايادي المحروسين

ويجرجروك انت وزووك زي الخروف ويسمعوك لستة كلام يادي الكسوف ما ابوخه

والبغبغان اللي تبغبغ كل من قرب حداه اتبغبغوا جم طرمخوا ع الطرمخان واللي يطرمخ يبسطوا وينغنغوا

وفي مجلس البغابيغ بنلقى البغبغان عمال يبغبغ في الكلام يضحك وهما يسخسخوا

ماتقولش يعني البغبغان اللي في بلاد الالعوبان هو اللي كان بيزغزغو الهي تهدي البغبغان واللي تبغبغ يوم معاه اقصف رقبته ودغدغه

والهي يوم المعمعان القاه هناك ويصير معاه من الباغبيغ اللي افتروا يوم او بغوا ياخلق لأوا ال لأة قوموا اتلحلحوا

شوفوا الكلاب حتى الكلاب لو شافو يوم واحد حرامي بينبحوا

وانتوا اللي مسروق عمركم

وانتو اللي ضايع حلمكم

ولا حتى يوم تتلحلحوا

ونصحتي ليكو تروحو

سبحانه من حكم عليكو البغبغان

تستاهلو ميت مليون كمان

تستاهلو ميت مليون كمان

وان شفتو يوم باغبيغ جايين عشان يدغدغوكو

اتبغبغو...اتبغبغو...اتتتتتتتتبغغغغغبغووووووووو

مفيش حاجة


مانيش عايزة خلاص حاجة
ولا محتاجة انا لحاجة
ولو عايزة صحيح حاجة
مخليتوليش ولا حاجة

عموماً بصوا فيه حاجة
هقولها بس محتاجة لعقول تفهم
ولو حاجة
مهيش مفهومة او حاجة
نفسرها بكام حاجة
نوضحها بكام حاجة
وأهى حاجة مع حاجة
هتظهر وتبان لنا حاجة

وانا ما بخفش من حاجة
مانيش مسنودة ولا حاجة
لكن ما بخفش من حاجة
لكن فرضاً لو هقول حاجة
هيحصل إيه ؟؟؟ ولا حاجة
هيعملوا إية ؟؟ ولا حاجة

و بعد الشر بعد الشر لو واحد من القاعدين
من السامعين من الضالين
فِهِم حاجة هَيعملوا إيه ؟؟؟؟
اكيد برضُه ولا حاجة

فنتوكل على الستار لوجه الله نقول حاجة

فيه ناس بتعيش علشان حاجة
وناس بتموت علشان حاجة
وناس بتموت على الحاجة

وناس تديلك الحاجة
وتبقى ليها محتاجة
وناس تديلك الحاجة
و تاخد ادامها ميت حاجة

وناس تكبر تكون حاجة
و ناس تصغر علشان حاجة

وناس منظر ومش حاجة
وتلقاه كبيرحرس ونفير عليه منظر
وهو جبان وشيخ منصر
ولا يبـنش عليه حاجة

كلامى يا خلق فيه حاجة؟
لحد دلوقتى فيه حاجه؟

كلام عادى وبسيط جداً ولا فِهشِ ولا حاجة
ما انا ما أقدرش أقول حاجة
صحيح نفسى أقول حاجة وميت حاجة
لكن مش قادرة اقول حاجة

لأنى لو هقول حاجة
هييجى ناس بتوع حاجة
وياخدونى ورا الحاجة

وهو لو سمع حاجة
هيعملوهالى ميت حاجة

عموما بصو لو واحد من القاعدين
عاوزنى أبلغه بحاجة
يقول مايخفش من حاجة

نعم فيه إيه؟
لالالالالأ مافيش سرقه
ولا تهليب ولا تهريب ولا حاجة

وبتقول إيه
مصمصوا إيه؟ وخصخصوا إيه؟
ده كله كلام مفيش حاجه

قضية إيه؟
ياشيخ روح خلاص مافيش حاجه

حرامى إيه ؟ ولَكّح إيه؟وهرب إيه؟
شــفـافـيـه ومافيش حاجة

وبتقول إيه؟لالالآلأ عـــيب
لافيه تدليسولاترقيص
ولا تدبيس ولا حاجه

سمع مع هووووس
انا حاسسة انه فيه حاجة

دقيقة سكات لَتبقى حداد
انا حاسسه انه فيه حاجة

زمنكوا ياخلق فيه حاجة
ولازموا كام وميت حاجة
ده لو يعنى إذا كان فيه حاجة
انا عن نفسى مش حاسسة ولا بحاجة
ولا متضايقة ولا حاجة

سعادتك برضه مش زيـى مافيش حاجة ؟
أهـه بيقول مافيش حاجة

جنابك برضه مش زَيـىِ وعلشان زيي مافيش حاجة
أهـه بيضحك بيقول مافيش حاجة

ما أنا قولتلكو من الأول مافيش حاجة

عليا النعمه يا اخوانا مافيه حاجة
ورحمة ابويا ويا أبوك على إللّى جابوك ما فيه حاجه

وعهد الله . وعهد الله. وعهد الله
ما خللولنا ولا حاجه

بقلك ايه خلاص خلص و فركش
يلا يا اخونا مفيش حاجه