قصيدة زجلية مغربية للاستاذ المبدع هشام الرقيوي

الحوت المرمي


ياقلب الرافة و السماحة ....للاه واش جيتك بالقباحة

لقيت فلانة ترويني وعلاش انت ترميني
لقيت القادرة تحميني
او بالجفا حالف تكويني


ياقلب الرافة و السماحة ....للاه واش جيتك بالقباحة

جيتك بضريب لمثال
او جيت نخفف لي ثقال
نقبل تجيفني يالحبال
او ما نسمع الرجلة بالريال


ياقلب الرافة و السماحة ....للاه واش جيتك بالقباحة

فيا طفاة الشموع
او بالحناجر تكسرات الضلوع
زلقت عند الطلوع
او ما نفعوني الدموع


ياقلب الرافة و السماحة.... للاه واش جيتك بالقباحة

هاني باقي صايم
او ف بحور العذابات عايم
الصغر ماهو دايم
او كيف الليالي كيف السمايم


ياقلب الرافة و السماحة ....للاه واش جيتك بالقباحة

حن ياقلب السماحة
او بلاك تضيع الراحة
عنداك ذياب الساحة
و لي ف الشر سباحة


ياقلب الرافة و السماحة.... للاه واش جيتك بالقباحة

بلاك راني نموت
او وياك يفوت الفوت
نكونو يحر او حوت
و نعيشو حباب او خوت
[/center]